АКШ президенти Дональд Трамп Иранга сүйлөшүүлөр үчүн көбүрөөк убакыт берүү максатында ок атууну токтотуу режимин узартканын, бирок өлкөнүн портторуна карата АКШнын деңиз блокадасы улана берерин билдирди.
Трамп шейшемби күнү социалдык тармактагы баракчасында Иран кагылышууну токтотуу боюнча сунуш киргизгенге чейин "ок атууну токтотуу мөөнөтүн узарта турганын" белгилеп, бирок ошол эле учурда "армияга блокаданы улантууну тапшырдым", - деди.
Трамп бул чечимди эки жумалык ок атууну токтотуу келишиминин мөөнөтү бүтөрүнө саналуу сааттар калганда чыгарды.
Ак үй буга чейин вице-президент Жей Ди Вэнс тынчтык сүйлөшүүлөрүнүн экинчи айлампасын өткөрүү пландалган Пакистанга барбай турганын жарыялаган.
АКШ президенти сүйлөшүүлөрдүн ийгиликсиз болушуна Ирандын ички карама-каршылыктары себеп болгонун белгилеп, Пакистан бийлиги андан ок атууну токтотуу режимин узартууну суранганын кошумчалады.
Трамп Truth Social баракчасындагы билдирүүсүндө: "Иран өкмөтүнүн олуттуу түрдө ыдырап баратканы күтүүсүз эмес жана Пакистандан генерал Асим Мунир менен премьер-министр Шейхбаз Шариф тарабынан лидерлери жана өкүлдөрү бирдиктүү сунуш киргизгенге чейин Иранга кол салууну кийинкиге калтырууну суранышты", - деп жазды.
Деңиз блокадасы улантылууда
Бирок Трамп Ирандын Ормуз кысыгындагы портторуна карата блокаданын улана берерин, ал эми АКШ армиясынын "башка бардык тараптан даяр жана жөндөмдүү" болорун айтты; ошондой эле ок атууну токтотуу мөөнөтүнүн "сунуштар берилип жана сүйлөшүүлөр кандайдыр бир жыйынтык чыкканга чейин" узартыларын белгиледи.
Ирандык жетекчилер АКШны ок атышууну токтотуу алкагындагы он пункттук милдеттенмелерди бузду деп айыптоодо.
Дүйнөлүк мунай агымы үчүн өтө маанилүү жол болгон жана кагылышуунун башында Иран тарабынан жабылган Ормуз кысыгы негизги пикир келишпестик маселеси бойдон калууда. Трамп ок атууну токтотуу келишимин кысыкты толук кайра ачуу шарты менен кабыл алганын билдирди.
Кысык аркылуу жүк ташуу чектелүү бойдон калууда. АКШнын деңиз флоту баштапкы сүйлөшүүлөр ийгиликсиз болгондон кийин кысыкка жакын Иран портторуна блокада киргизген.
