АКШ медиасынын маалыматына караганда, Ирандын Сауд Арабиясындагы «Принц Султан» авиабазасына жасаган ракеталык чабуулунан кеминде 12 америкалык аскер жаракат алды, алардын ичинен экөөсүнүн абалы оор. Ошондой эле АКШнын бир нече май куюучу учактары зыянга учурады.

«The Wall Street Journal» басылмасынын кабарына караганда, расмий өкүлдөр чабуулда дрондордун да колдонулганын билдиришти.

Бул чабуул АКШнын Борбордук командачылыгы (CENTCOM) Иран менен болгон согуштун төртүнчү аптасында 300дөн ашык америкалык аскер жаракат алганын билдирген, аймактагы чыңалуу курчуп турган маалда болду.

АКШнын Мамлекеттик катчысы Марко Рубио согуштун дагы «эки жумадан төрт жумага чейин» созулушу мүмкүн экенин белгиледи. Ал согуштан кийинки эң чоң кыйынчылык — Ирандын Ормуз кысыгынан өткөн кемелерден акы алуу аракетине бөгөт коюу болорун айтып, мындай аракетти «мыйзамсыз» жана «дүйнө үчүн кооптуу» деп мүнөздөдү.

Израиль Иранга дагы чоң масштабдуу чабуул жасады.

Бул окуялардан кийин мунайдын баасы баррелине 100 доллардан жогору көтөрүлдү, ал эми АКШнын фондулук рыноктору президент Дональд Трамп Ирандын энергетика тармагына кол салууларды токтоткондон кийин төмөндөдү.

Йеменде хуситтер согушту кеңейте аларын билдиришти. Өлкөнүн көпчүлүк бөлүгүн көзөмөлдөгөн топ, эгерде дагы көп мамлекет Тегеранга каршы согушка кошулса, АКШ же Израиль операциялары үчүн Кызыл деңизди колдоно турган болсо, түздөн - түз аскердик кийлигишүүгө даяр" болорун билдиришти.

Трамп АКШнын Тегеранга жолду кайра ачуу мөөнөтүн узарткандан бир күндөн кийин, Иран жума күнү үч кемени Ормуз кысыгынан өтпөө боюнча эскерткенин жарыялады.

АКШ менен Израилдин чабуулдарына жооп катары Иран АКШнын аскердик базалары жайгашкан Израилге, Иорданияга, Иракка жана Перс булуңундагы мамлекеттерге каршы дрон жана ракеталар менен сокку урду. Бул чабуулдар адам өлүмүнө жана инфраструктуранын зыянга учурашына алып келди.