Шаршемби күнү Түркиянын президенти Режеп Таййип Эрдоган Израиль өкмөтүнүн Иранга каршы уланып жаткан "мыйзамсыз согуштун" биринчи кезектеги жооптуусу экенин айтты.
Анкарада Адилеттик жана Өнүгүү партиясынын (АКП) фракциялык жыйынында сүйлөгөн сөзүндө түрк лидери: "Жаңжал, башаламандык жана кризис жараткан Израиль өкмөтү бул мыйзамсыз согуштун биринчи даражадагы жооптуусу, ал биздин аймакты отко айландырып гана тим болбостон, бүткүл адамзаттын мойнуна өтө оор экономикалык жүктү жүктөөдө", - деди.
Ошондой эле "Согушта төгүлгөн ар бир тамчы кан Нетаньяхунун саясий өмүрүн узартуучу булак болору унутулбашы керек" деп айтты.
"Биздин үмүтүбүз - акыл-эс жеңип, мындан ары кан төгүлбөстөн тынчтыктын орнотулушу. Биз бул үчүн колубузду, зарыл болсо денебизди тобокелге сала беребиз", - деп кошумчалады.
