Гебрейесус АКШда жайгашкан X компаниясынын социалдык медиа аккаунтунда Нидерландиянын желеги астындагы "MV Hondius" кемесинде хантавирус аныкталгандан кийинки окуялар тууралуу маалымат бөлүштү.
Хантавирус учурлары боюнча 2-майдан бери жаңы өлүм учуру каттала электигин билдирген Гебрейесус: "ДССУга билдирилген жалпы 11 учурдун 8и лабораториялык тесттер менен Андес вирусунун инфекциясы катары тастыкталды. Калган бир учур болсо кенен текшерүүдөн өтүп жатат. ДССУ глобалдык калк үчүн тобокелдиги төмөн деп кароону улантууда", - деди.
Тиешелүү бардык өлкөлөрдүн эксперттери менен тыгыз байланышта экендигине токтолгон Гебрейесус, расмий эл аралык саламаттыкты сактоо регламенттеринин каналдары аркылуу кемеден эвакуацияланган жүргүнчүлөрдүн жана экипаждын ден соолугу жана абалы тууралуу жумалык отчетторду алып жатышканын белгиледи.
Гебрейесус: "Эл аралык координация коомдук саламаттыкты сактоо аракеттерин колдоону улантууда", - деди.
Кемедеги хантавирус учурлары
Нидерландиянын желеги астындагы люкс круиздик кемеси MV Hondius 1-апрелде Аргентинанын Ушуайя портунан жолго чыккан.
Кемеде 11-апрелде 70 жаштагы нидерландиялык жараны каза болуп, 13-16-апрель күндөрү Африканын батышындагы Тристан-да-Кунья, Инаксессибл жана Найтингейл аралдарына барган учурунда кемеге дагы 6 жүргүнчү түшкөн. Ошол күндөрдөгү маалыматтарга караганда, кемеде жалпысынан 180 жүргүнчү жана экипаж мүчөлөрүнүн болгону билдирилген.
Кеме Санта-Эленага барганда болжол менен 30 жүргүнчү кемеден түшкөн. Каза болгон жүргүнчүнүн сөөгү жана симптомдор байкалган аялы да кемеден түшкөн. Йоханнесбургга бара жаткан голландиялык аял 26-апрелде каза болгон.
Оорунун белгилери байкалган Улуу Британиянын жараны болгон эркек жүргүнчү жана анын жанындагы америкалык досу да 27-апрелде кемеден түшүрүлгөн.
ДССУ 2-майда "MV Hondius" Кабо-Вердеде (Жашыл Тумшук аралдарында) жүргөн учурда кемеде хантавирус учурлары байкалганын жарыялаган. 3-майда германиялык аял жүргүнчүнүн каза болушу менен бул кемеде саякаттап жүрүп вирустан каза болгондордун саны 3кө жеткен.
Кабо-Верде бийлиги кеменин портуна токтошуна жана кандайдыр бир адамдын кемеден түшүшүнө уруксат бербегендиктен, ДССУ менен Испаниянын ортосундагы сүйлөшүүлөрдөн кийин 5-майда жүргүнчүлөрдү түшүрүү үчүн "MV Hondius" кемесин Тенерифеге алып келүү чечими кабыл алынган.
Тенерифеден эвакуацияланган жүргүнчүлөрдүн ичинен 1 француз жана 1 америкалык жарандын хантавирус тесттери оң натыйжа берген.
Хантавирус
Хантавирус көбүнчө кемирүүчүлөрдөн жугат.
Вирус кемирүүчүлөрдүн кургаган заңы, заарасы жана шилекейи менен булганган абаны дем алуу аркылуу, кээде кемирүүчүлөрдүн чагуусу аркылуу жугуп, дене табынын көтөрүлүшү, чарчоо жана булчуңдардын оорушу сыяктуу белгилерди пайда кылат.
Вирус ошондой эле дем алуу жетишсиздигине алып келиши мүмкүн, ал эми кээ бир учурларда ички кан агууга жана бөйрөк жетишсиздигине алып келиши мүмкүн.
