Япониянын түндүгүндөгү токойлордо чыккан өрт менен жүздөгөн өрт өчүрүүчүлөр күрөшүп жатышат. Бийлик өкүлдөрү ишемби күнү 3 200дөн ашуун тургунга үйлөрүн таштап, коопсуз жайга барууга чакырык салышты.

Жергиликтүү бийликтин маалыматына караганда, Иватэ префектурасынын тоолуу аймактарында үч күн мурун башталган өрт ишемби күнү эртең мененден тарта болжол менен 700 гектар жерди күлгө айландырды.

Оцути шаарчасына жакын өрөөндөн көтөрүлгөн түтүн 30 чакырым алыстыктан байкалууда. Өрттү өчүрүүгө эки тик учак жана турак үйлөрдүн коопсуздугун камсыздоо үчүн ондогон өрт өчүрүүчү унаа жиберилди.

Билдирүүдө ишемби күнү өрттү өчүрүү үчүн он чакты тик учак, 1300дөн ашык өрт өчүрүүчү жана Жапониянын өзүн-өзү коргоо күчтөрүнүн аскерлери тартылаары айтылган.

Кеминде сегиз имарат өрттөнгөн бирок кабарларга караганда, бардык тургундар эвакуацияланган.

Иватэ шаарынын расмий өкүлү AFP агенттигине: «Биз өрттү толугу менен өчүрүү үчүн болгон күчүбүздү жумшап жатабыз жана күн ичинде маалыматтарды жаңылап турабыз», — деп билдирди.

Оцучиде бир адам NHK коомдук телерадиокомпаниясына: "Жамгыр жаайт деген үмүттөмүн", - деди.

Кыш айларынын барган сайын кургак болушу токой өрттөрүнүн чыгуу коркунучун жогорулатууда. Өткөн жылдын башында Иватэнин Офунато шаарында болгон өрт акыркы жарым кылымдагы эң чоң кырсык катары катталган.

Окумуштуулар климаттын өзгөрүшү кургакчылык мезгилин дагы да узартып, токой өрттөрү үчүн «ыңгайлуу» шарттарды түзүп жатканын эскертишүүдө.