Орусия "космосто куралдануу жарышынын алдын алууга карата шашылыш конкреттүү кадамдар жасалышы керек" деди.

Орусиянын Тышкы иштер министрлигинин басма сөз катчысы Мария Захарова журналисттерге АКШнын Аскер-аба күчтөрүнүн катчысы Трой Мейнктин "космосту көзөмөлдөө үчүн керектүү курал-жарактарга ээбиз" деген билдирүүсүнө комментарий берди.

АКШнын бул жагынан кыйратуучу багытты карманып жатканын билдирген Захарова, мунун терс кесепеттерге алып келиши мүмкүн экенин баса белгилеп, мындай деп кошумчалады:

"Вашингтон өзүнүн тар кызыкчылыктары үчүн космосто ар кандай куралдуу кагылышуунун адамзат үчүн катастрофалык кесепеттерин толугу менен этибарга албай коюуга даяр. Бул космоско байланыштуу изилдөөлөргө жана өлкөлөрдүн космосту изилдөө мүмкүнчүлүгүнө коркунуч келтирет, Жердеги көптөгөн социалдык жана экономикалык процесстер үчүн коркунучтарды жаратат. Космосто куралдануу жарышынын алдын алуу үчүн шашылыш конкреттүү кадамдар жасалышы керек".

Басма сөз катчысы Захарова космосто курал-жарак жайгаштырууга тыюу салуу боюнча сүйлөшүүлөрдү дароо баштоо керектигин айтты.