Украинанын чыгышындагы Днепропетровск облусунда Никополь шаарындагы жабык базарга дрондор менен жасалган кол салууда беш жаран каза болуп, он тогуз адам жаракат алды.
Жергиликтүү прокуратура чабуулдун ишемби күнү саат 9:50дө болгонун билдирди.
Аймактын губернатору Александр Гянджа каза болгондордун арасында үч аял жана эки эркек киши болгонун, ал эми жаракат алгандардын арасында 14 жаштагы кыздын абалы оор экенин билдирди.
Ушул эле күнү эртең менен фронтко жакын Харьков шаарында беш адам жаракат алган.
Украинанын аба күчтөрү Россиянын түн ичинде 286 дрон учурганын, алардын 260нын жок кылынганын жарыялады.
Сумы облусунун түндүгүндө отурукташуу аянттары жана жарандык инфраструктурага багытталган чабуулдарда 11 адам жаракат алган. Тез жардам кызматтары бөлүшкөн сүрөттөрдөн имараттын жогорку кабаттары өрттөнүп жатканын көрүүгө болот.
Днепропетровск облусундагы мурунку чабуулдарда үч адам, анын ичинде 5 айлык наристе жана 6 жаштагы бала жаракат алганы кабарланган.
Россия тараптан Украинанын чек арасына жакын Ростов облусунда ракеталык жана дрондук чабуулдан улам Таганрог шаарында бир адам каза болуп, төртөө оор жаракат алган.
Облус губернатору Юрий Слюссар жаракат алгандардын арасында үч жергиликтүү тургун жана бир чет элдик жаран бар экенин, алардын баары оор абалда экенин билдирди.
Азов деңизинде чет элдик жүк ташуучу кеме атып түшүрүлгөн дрондун сыныктарынан улам жабыркап, өрт чыкканы кабарланууда.
Сүйлөшүүлөр токтоду
Ошол эле учурда Украинанын президенти Владимир Зеленский коопсуздук боюнча кызматташуу боюнча сүйлөшүүлөр үчүн Түркияга келди.
Зеленский Пасха майрамында ок атышууну токтотууга даяр экенин билдирди, ал эми Кремль Киевден "так түзүлгөн" сунуш ала электигин жарыялады.
Украина Россияны дагы көп аймакты алуу үчүн согушту узартуу менен айыптап Москванын тынчтык орнотууну каалабаганын жактап жатат.
АКШнын ортомчулугу менен жүргүзүлгөн сүйлөшүүлөр Жакынкы Чыгыштагы согуштан улам токтоду.
Зеленский АКШдан бир делегацияны Украинага чакырып Москва менен сүйлөшүүлөрдү кайра баштоону суранды.
Украинанын лидери АКШ делегациясын алгач Киевге, андан кийин Москвага бара аларын айтып, эгерде үч тараптуу формат ишке ашпай калса, бул ыкманы колдонууга болорун билдирди.
