Украинанын президенти Владимир Зеленский украин чалгындоо жана аскер кызматкерлерине төрт жылдан ашык убакыттан бери уланып келе жаткан согушта колдонулган орусиялык объектилерге каршы «алдын алуучу чараларды» көрүүнү тапшырганын айтты.
Шаршемби күнү кечинде видео кайрылуусунда Зеленский күндүн башында Коргоо чалгындоо кызматынын башчысы Олег Иващенкодон брифинг алганын, анда Украинанын энергетикалык объектилерине кол салуулар тууралуу маалымат камтылганын айтты. Украинанын лидери өлкөнүн чалгындоо кызматтары бул чабуулдарды Москва «оор сезген» деп баалаган «айрым орусиялык документтерди» алганын билдирди.
Зеленский Украина бул контекстте бир катар буталарга, анын ичинде фронттон 1200 чакырымдан ашык алыстыктагы буталарга сокку урганын жана орусиялык аскердик байланыш борборлору да бутага алынганын белгиледи.
«Мен биздин чалгындоо кызматтарыбызга жана аскерлерибизге орусиялыктар согушту күчөтүү үчүн колдонуп жаткан объектилерге каршы алдын алуучу чараларды көрүүнү тапшырдым», - деди украин лидери.
Зеленский Москва азыр абадан коргонуу каражаттарынын бир бөлүгүн Орусиянын борборундагы Валдай шаарына жана Керч көпүрөсүнө алып кеткенин билдирди. Керч көпүрөсү Орусия 2014-жылы Крымды аннексиялагандан кийин жарым аралды материк менен байланыштыруу үчүн курулган.
Зеленский ошондой эле Орусиянын 60тан ашык аймагында күйүүчү май жетишсиздиги байкалып жатканын билдирди.
Украинанын жакында эле Орусиянын мунай иштетүүчү заводдоруна жасаган дрон чабуулдарынан кийин көптөгөн объектилер техникалык тейлөө иштерине байланыштуу ишин токтотуп, Москваны мезгил-мезгили менен ички күйүүчү май рыногун турукташтырууга багытталган чектөөлөрдү киргизүүгө мажбур кылды.
Жакында эле Тюмень жана Татарстан Автономдуу Республикасы сыяктуу бир нече аймактардын жергиликтүү бийликтери күйүүчү май сатууга чектөөлөрдү киргизишти.
Крымда Орусия колдогон бийликтер дем алыш күндөрү жеке адамдарга жана ишканаларга күйүүчү май сатуу толугу менен токтотулганын, камсыздоолор зарыл болгон коомдук кызматтар үчүн гана сакталганын жарыялашты.
Ушул айдын башында Украинанын Башкы штабы өз күчтөрү Орусиянын 16 ири мунай иштетүүчү заводдоруна жана күйүүчү май терминалдарына кол салып, алардын кубаттуулугунун 30 пайыздан ашыгын иштен чыгарганын билдирген.
