Кыргызстандын Чолпон-Ата шаарында Евразия өкмөттөр аралык кеңешинин жыйыны өттү, ага Евразия экономикалык биримдигине (ЕЭБ) мүчө өлкөлөрдүн өкмөт башчылары катышты.
Кыргызстандын премьер-министри Адылбек Касымалиев өткөргөн жыйынга Россиянын премьер-министри Михаил Мишустин, Казакстандын премьер-министри Олжас Бектенов, Беларустун премьер-министри Александр Турчин, Армениянын премьер-министри Никол Пашинян, Өзбекстандын премьер-министри Абдулла Арипов, Ирандын өнөр жай, тоо-кен жана соода министри Сейед Мухаммед Атабак жана Кубанын Москвадагы элчиси Гонсалес Энрике Орта катышты.
Касымалиев жыйындагы сөзүндө дүйнөлүк азык-түлүк бааларынын өсүшү социалдык чыңалууга алып келерин эскертти.
Биримдиктин жалпы каржы рыногун натыйжалуу өнүктүрүүнүн маанисине көңүл бурган Касымалиев бул рыноктор товарлардын, кызмат көрсөтүүлөрдүн, капиталдын жана жумушчу күчүнүн эркин жүгүртүлүшүнүн негизин түзүшү керек экендигин айтты.
Касымалиев биргелешкен каржы рыногу мүчө өлкөлөргө атаандаштык артыкчылыктарды берүү менен экономикалык өсүш үчүн жаңы мүмкүнчүлүктөрдү жаратарын белгилеп, бир мүчө өлкөнүн брокердик компанияларына жана дилерлерине башка Евразия экономикалык биримдигинин мүчө өлкөлөрүнүн биржаларында уюштурулган соодага катышууга мүмкүндүк берген келишимге кол коюу да ушул багыттагы маанилүү кадамдардан экенин баса белгиледи.
Биримдик ичиндеги соода көлөмү 7,3% өсүп 102 миллиард долларга жетиши күтүлүүдө
Казакстандын премьер-министри, Биримдиктин башчысы Бектенов дүйнөлүк экономикадагы белгисиздикке көңүл буруп, Евразия экономикалык биримдигинин ичиндеги соода көлөмү быйыл 7,3 пайызга өсүп, 102 миллиард долларга жетери күтүлүп жатканын билдирди.
Армениянын премьер-министри Пашинян да Евразия экономикалык биримдигине мүчө мамлекеттер менен кызматташууну бекемдөө өлкөсү үчүн тышкы саясат жана экономикалык артыкчылык бойдон каларын жана Биримдиктин ичинде пайда болгон тоскоолдуктарды жоюу керектигин билдирди.
Россиянын премьер-министри Мишустин де Евразия экономикалык биримдиги чет элдик жеткирүүчүлөргө көз карандылыкты азайтуу жана айыл чарба тармагында ата мекендик өндүрүштү көбөйтүү зарылдыгын баса белгиледи.
Кийинки жыйынды 1-2-октябрда Беларустун борбору Минск шаарында өткөрүү чечими чыгарылды.
