Израилдин коргоо министри Исраэль Кац Газа тилкесине комплекстүү чабуулдарды кайра баштоо жана аймактан болжол менен 2 миллион палестиналыкты сүргүнгө айдоо планын ишке ашыруу "жакындап калганын" айтты.

Ок атышууну токтотууга карабастан, коргоо министри Кац Газа тилкесине кайрадан "комплекстүү чабуул" жасап, "палестиналыктарды кууп чыгабыз" деп коркутту.

"Баарыбыз мунун (ХАМАСтын өз ыктыяры менен куралын таштоосу) болбой турганын билебиз" деген Кац Израиль армиясы Газа тилкесине комплекстүү чабуул жасоо буйругу берилгенден кийин "ишти бүтүрүүгө" жана ушундайча палестиналыктарды сүргүнгө айдоо планын ишке ашырууга даяр экенин кошумчалады.

Кац ошондой эле 2023-жылдын октябрынан бери Израилдин чабуулдарынан улам Газа тилкесинин калкы 70 пайызга азайганын ырастады.

Ушул айдын башында Исраэль Кац Израиль палестиналыктарды Газадан деңиз жана кургактык аркылуу кууп чыгууга даяр экенин, бирок АКШнын эки миллион адамдын кайда бараарын чечишин күтүп жатканын билдирген.

АКШнын Израилдеги элчиси Майк Хакаби болсо "адамдарды алардын эркине каршы Газадан күч менен чыгаруу" планын четке каккан.

Газанын Саламаттыкты сактоо министрлигинин акыркы билдирүүсүнө ылайык, 2023-жылдын октябрынан бери Израилдин Газага жасаган чабуулдарынан 73 000ден ашуун палестиналык каза болуп, 174 000ден ашууну жаракат алды.

10-октябрда Газада ок атышууну токтотуу күчүнө киргенине карабастан Израиль армиясы аймакка күн сайын чабуул коюуну улантууда.