Расмий өкүлдөрдүн маалыматына караганда, ушул аптада Тынч океандын түштүк бөлүгүндөгү Кирибати аралынын жээгинде үч ай бою узундугу 6 метрлик чакан кайыкта сүзүп жүргөн беш адам, анын ичинде эки бала куткарылды. Дагы төрт адам дайынсыз болууда.

Австралиянын телерадиоберүү корпорациясынын (ABC) маалыматына ылайык, Микронезия Федеративдик Штаттарынан чыгышты көздөй болжол менен 5 400 чакырым сүзүп кеткен адамдар тобун жекшемби күнү Кирибатиге караштуу Фаннинг аралынын жанындагы жергиликтүү тургундар куткарышкан.

Гуамдагы АКШнын Жээк күзөт кызматы шейшемби күнү тогуз адамды ташыган кайык Микронезиядагы Руо аралына кайтып келбей, 30-июлда дайынсыз жоголгонун ырастады.

Билдирүүдө белгиленгендей, 85 700 чарчы чакырым аянтты камтыган 10 күндүк издөө иштеринин жүрүшүндө дайынсыз жоголгон кайык жана анын жүргүнчүлөрү табылган эмес.

АКШнын Жээк күзөт кызматы Associated Press (AP) агенттигине электрондук кат аркылуу: «Бул беш адамдын табылып, учурда коопсуз жерде экени укмуштуудай жана кубанычтуу жаңылык», — деп билдирди.

Ал эми AP агенттигинин дайынсыз жоголгон калган төрт адамдын кайда экени тууралуу суроосуна АКШнын Жээк күзөт кызматы азырынча жооп бере элек.