Саламаттыкты сактоо булактары Анадолу агенттигине Газа шаарынын түндүгүндөгү Шейх Радван конушунда Израилдин бир топ жай тургундарга карай чабуулунан бир палестиналык каза болуп, кеминде үчөө жаракат алганын билдиришти.

Күбөлөрдүн айтымында, Израилдин учкучсуз учуучу аппараты ошол эле конуштагы Биринчи көчөнүн кесилишине жакын жерге чогулган жай тургундарга ракета аткан.

Буга чейин Израиль күчтөрү Жебалия качкындар лагеринин Аль-Худжа аймагына ок чыгарып, дагы бир палестиналыкты набыт кылышты.

Медициналык топтор сөөктү Газа шаарынын батышындагы Шифа ооруканасына жеткиришкен.

Башка бир окуяда саламаттыкты сактоо булактары жана күбөлөр Жебалиядагы Аль-Омари мечитинин жанында жай тургундарга карай учкучсуз учуучу аппараттын соккусунан үч палестиналык, анын ичинде бир бала жаракат алганын тастыкташты.

Газадагы өкмөттүн маалымат каражаттары кеңсеси 14-апрелде Израиль ок атышууну токтотуу келишимин киши өлтүрүүлөр, камакка алуулар, блокада чаралары жана ачкачылык саясаты менен 2400 жолу бузганын жарыялаган.

Газанын Саламаттыкты сактоо министрлигинин маалыматы боюнча, ок атышууну токтотуу күчүнө киргенден бери Израилдин ок атышууну токтотуу келишимин бузуусу 809 палестиналыктын өлүмүнө жана 2267 адамдын жаракат алышына алып келген. 

2023-жылдын октябрь айынан бери Израиль Газада геноциддик согуш жүргүзүп, 72 500дөн ашык палестиналыкты, көбүнчө аялдар менен балдарды өлтүрүп, 172 000ден ашуун адамды жарадар кылды.

Израиль аймактын көпчүлүк бөлүгүн талкалап, бүтүндөй калкын жер которгон.