Транспорт жана инфраструктура министри Абдулкадир Уралоглу акыркы 24 жылда ишке ашырылган долбоорлор аркылуу темир жол тармагы 13 919 километрге чейин кеңейтилгенин жана 2251 километр жогорку ылдамдыктагы темир жол линиялары курулганын жарыялады.

Уралоглу жазуу жүзүндөгү билдирүүсүндө АК партиясы 2002-жылы бийликке келгенден бери темир жол тармагында жасалган иштер тууралуу маалымат берди.

Түркиянын жогорку ылдамдыктагы темир жол операциялары боюнча Европада 6-орунда, ал эми дүйнөдө 8-орунда тураарын белгилеген Уралоглу: "Бүгүнкү күнгө чейин жогорку ылдамдыктагы поезддерибиз менен 114 миллион жүргүнчү ташыдык. Темир жолдорубузду Түркиянын транспорт системасынын күчтүү бөлүгүнө айландырдык. Темир жол тармагыбызды 10 948 километрден 13 919 километрге чейин көбөйттүк. 2251 километр жогорку ылдамдыктагы темир жол линияларын нөлдөн баштап курдук", - деди.

Уралоглу бир гана темир жол линияларын куруп эле калбастан учурдагы инфраструктураны комплекстүү түрдө өзгөрткөнүн белгиледи.

Министр Уралоглу темир жол тармагын толугу менен жаңыртып, модернизациялаганын айтып: «Биз линияларыбыздын 61 пайызын сигнализациялап, жарымынан көбүн электрлештирүү менен учурдагы инфраструктурабызды дүйнөлүк деңгээлдеги темир жол тармагына айландырдык», - деди.

Уралоглу ошондой эле Түркия боюнча жаңы жогорку ылдамдыктагы темир жол жана темир жол инвестициялары уланып жатканын белгилеп:«Жогорку ылдамдыктагы темир жол менен түздөн-түз байланышкан провинциялардын санын 2028-жылга чейин 11ден 27ге чейин көбөйтүүнү максат кылып жатабыз», - деп кошумчалады.