Анадолу агенттигинин маалыматына караганда, Түркиянын коргоо министри Яшар Гүлер төрт өлкөнүн катышуусунда өтө турган коргоо өнөр жайы кызматташтыгы боюнча өз ара түшүнүшүү меморандумуна кол коюу аземине катышуу үчүн Катарга барат.
Гүлердин шейшемби күнү түштөн кийин Катарга барары күтүлүүдө.
Түркия, Катар, Пакистан жана Индонезия шаршемби күнү өз ара түшүнүшүү меморандумуна кол коюшат.
Андан тышкары, Катардын коргоо иштери боюнча мамлекеттик министри Шейх Сауд бин Абдулрахман Аль Тани дүйшөмбү күнү Дохадагы Глобалдык коопсуздук форумунда Катардын жакында жергиликтүү коргонуу өндүрүш борборун түзүү планын жарыялай турганын билдирди.
Аль Тани Катар өзүнүн ички коргонуу кубаттуулугун өнүктүрүү жана коргонуу компанияларына инвестиция салуу мүмкүнчүлүктөрүн изилдөө үчүн АКШ, Улуу Британия жана Франция сыяктуу аймактык жана эл аралык өнөктөштөр менен иштешип жатканын айтты.
Ошондой эле Аль-Тани Катардын жакында баллистикалык ракеталарга, дрондорго жана киберчабуулдарга каршы мүмкүнчүлүктөрүн күчөтүү үчүн жаңы өнөктөштүктү жарыялай турганын маалымдады, бирок кеңири маалымат берген жок.
Бул билдирүүлөр, Катардын энергетика тармагына жана деңиз соодасына таасирин тийгизген АКШ-Израиль-Иран жаңжалы учурунда айтылды.
Жаңжал башталгандан көп өтпөй Катар Рас-Лаффандагы негизги суюлтулган жаратылыш газы комплексинин көпчүлүк бөлүгүн жаап, стратегиялык Ормуз кысыгы аркылуу жүк ташууларга коюлган чектөөлөр дүйнөлүк сооданы үзгүлтүккө учураткан.
Түркия менен Катар акыркы жылдары стратегиялык өнөктөштүгүн бекемдеп, коргонуу, коопсуздук, соода жана инвестиция жаатындагы кызматташтыкты кеңейтишти. Дохада биргелешкен аскердик командачылыкты сактап калуу менен эки өлкө аймактык маселелер боюнча координация түзүүдө.
2025-жылдын октябрь айында Түркия менен Катар эки тараптуу мамилелерди тереңдетүүгө багытталган кеңири келишимдердин алкагында коргоо өнөр жайы кызматташтыгы боюнча өз ара түшүнүшүү меморандумуна кол коюшту.
