Германиянын федералдык прокуратурасынын маалыматына караганда, 2022-жылы Орусия менен Германиянын ортосундагы “Түндүк агым” жаратылыш газ куурларына зыян келтирген суу астындагы жардырууларга байланыштуу украиналык эркек шаршемби күнү Хорватияда камакка алынды. 

Германиянын купуялуулук эрежелерине байланыштуу фамилиясы жашырылган украиналык жаран Владимир З. жергиликтүү полициянын Европанын камакка алуу ордерин аткаруу учурунда Хорватиянын Пула шаарында камакка алынды. 

2022-жылдын 26-сентябрындагы суу астындагы жардыруулар орусиялык жаратылыш газын Германияга ташуу үчүн Балтика деңизинин түбүндө курулган куурларга зыян келтирген. Бул зыян Украинадагы согушка байланыштуу чыңалууну күчөттү, анткени Европа өлкөлөрү Кремлдин Украинага каршы кеңири масштабдуу чабуулунан кийин Орусиянын энергетикалык булактарына көз карандылыгын азайтуу аракеттерин улантышты.