Анадолу агенттиги (AA) Израилдин Газада турак жай имараты менен жарандык унааны бутага алган аба соккуларынан жети палестиналык каза болуп, 45тен ашуун адам жаракат алганын билдирди.
Саламаттыкты сактоо тармагындагы булактар жума күнү Анадолу агенттигине берген маалыматта араларында үч аял болгон жаралуулардын Газадагы “Аль - Шифа” ооруканасы менен Палестина Кызылайынын көчмө ооруканасына жиберилгенин билдирди.
Булактар каза болгондордун үчөөсүнүн жарандык унаага жасалган кол салууда, төрт кишинин турак жай имаратына жасалган кол салууда каза болгонун белгилеп, жаралуулардан бир канчасынын абалынын оор экенин маалымдады.
Окуя болгон жерге барган Анадолу агенттигинин кабарчысы, чабуулдан бир нече саат өткөндөн кийин да Газанын батышындагы Римал районунда бутага алынган имаратта өрттүн уланып жатканын билдирди.
Имарат олуттуу зыянга учурап, айланадагы курулуштар да чоң өлчөмдө жабыркаган.
Көргөн күбөлөр Израиль дронунун Абу Аси май куючу станциясына жакын жердеги Аль - Вахад проспктисиндеги жарандык унаага кол салганын Анадолу агенттигине билдиришти.
Ок атышпоо эрежелери бузулууда
Израиль 2023-жылдын октябрь айынан бери Газада жүргүзүп жаткан геноцидде көпчүлүгү аялдар жана балдар болгон 72 600дөн ашуун палестиналыкты өлтүрүп, 172 000ден ашык кишини жарадар кылды.
Ошондой эле аймактын чоң бөлүгүн урандыга айлантып, жалпы калкты жер которууга мажбур кылды.
2025-жылдын октябрь айында ок атууну токтотуу келишимине жетишилгенине карабастан, Израиль бул келишимди күн сайын бузууну улантып, ушул күнгө чейин 857ге жакын палестиналыктын өмүрүн алды жана 2 486 кишини жаракат кылды.
