Сирия өкмөтү беш жай тургундун өмүрүн алган аба соккуларына чейин Иордания менен координациянын түзүлбөгөнүн билдирди.

Сириянын мамлекеттик SANA маалымат агенттигинин билдиргенине караганда, өкмөт Иорданиянын аба соккуларынан кийин өлкөнүн түштүгүндөгү кырдаалды кылдат көзөмөлдөп жатат.

Маалыматта аба соккуларынан араларында балдар да болгон беш адам каза болуп, дагы бир нече адам жаракат алганы айтылып, аскердик операцияга чейин Сирия тарап менен эч кандай координация түзүлбөгөнү белгиленди.

Ошондой эле соккулардан жабыркаган сириялык үй-бүлөлөргө тилектештик билдирилип, окуянын бардык жагдайларын аныктоо үчүн кеңири иликтөө башталганы маалымдалды.

Мындан тышкары, Иордания менен байланыш каналдарынын ачык экендиги жана окуяны жөнгө салуу боюнча талкуулардын уланып жатканы белгиленди. Чек ара аймактарындагы аракеттерди жүргүзүүдө жеринде биргелешип иш алып баруу жана коопсуздук боюнча координация түзүүнүн маанилүү экени баса белгиленди.

Маалыматта мындай координация Сириянын эгемендүүлүгүн коргоо, эки өлкөнүн коопсуздугун жана туруктуулугун камсыз кылуу үчүн өтө маанилүү экени айтылды.

Иорданиянын куралдуу күчтөрү жума күнү Карактагы чиркөөгө жасалган кол салуу үчүн өч алуу максатында Сириянын түштүгүндөгү «террористтик» буталарга абадан сокку урганын жарыялады. Ошондой эле операция Сирия өкмөтү менен макулдашылганын билдирди.

Сирия болсо Иорданиянын Дара провинциясынын ар кайсы аймактарына жасаган аба соккуларынан аялдар жана балдар менен беш жарандын каза болгонун маалымдады.