АКШлык миллиардер жана ишкер Илон Маск өзүнө таандык Starlink спутник системасына чектөө киргизилгени тууралуу айыптоолордон улам Украина менен арадагы чыңалуу күчөп жаткан учурда, бул өлкөдө элита менен карапайым калктын кызыкчылыктарынын ортосунда «эбегейсиз айырма» бар экенин билдирди.

Маск АКШда жайгашкан X социалдык тармагындагы баракчасында акыркы мезгилде чыңалып жаткан Вашингтон менен Киевдин ортосундагы мамилелер тууралуу билдирүү жасады.

Украинадагы элита менен карапайым калктын кызыкчылыктарынын ортосунда «эбегейсиз айырма» бар экенин белгилеген Маск: «Элиталар Украинага бөлүнгөн жүздөгөн миллиард доллардан чоң байлык топтоп жатышат, ал эми карапайым элдин балдары фронтко өлүмгө туш болуу үчүн жөнөтүлүүдө», — деп жазды.

Маск АКШ салык төлөөчүлөрүнүн Украинага бөлүнгөн каражатынын бир бөлүгү арам акчаны адалдоо схемалары аркылуу кайра кайтарылып, өлкөдөгү саясий өнөктүктөрдү каржылоого жумшалып жатканын айтты. Маск айрым америкалык саясатчылар Украинанын кызыкчылыктарын АКШнын кызыкчылыктарынан жогору коюп жатканын белгиледи.

АКШнын жалпыга маалымдоо каражаттарында SpaceX компаниясынын башкы директору Илон Маск Украина армиясы колдонгон Starlink спутник системасынын интернет кызматын жайлатууга буйрук бергени тууралуу маалыматтар жарыяланган.

Украинанын президенти Владимир Зеленский Starlink системасы Украинада толугу менен өчүрүлбөгөнүн, бирок интернет ылдамдыгына коюлган чектөөлөрдөн улам анын айрым аскердик жана гуманитардык максаттарда колдонулушу азайганын билдирген.

АКШнын президенти Дональд Трамп да Starlink системасынын аскердик версиясы болгон Starshield аркылуу Украина армиясына көрсөтүлгөн интернет кызматына байланыштуу көйгөйдүн «чечилгенин укканын» айткан. Ошол эле учурда ал көйгөй чечилбеген  болсо, Маск менен «сүйлөшөрүн» билдирген.