Кыргызстан Кытайдын кыргыз жарандары үчүн визалык талаптарды жеңилдетүү тууралуу чечимин кубануу менен кабыл алганын билдирди.
Президенттин Администрациясынын тышкы саясат бөлүмүнүн башчысы Сагынбек Абдумуталип бул тууралуу билдирүү жасады.
Кытайдын Кыргызстанды 10 күндүк визасыз кирүү программасына кошконун жана визалык режимди жеңилдетүү чечимин кубануу менен кабыл алганын белгилеген Абдумуталип, 20-августтан баштап кыргызстандыктар 10 күнгө чейин визасыз Кытайга кире алаарын эске салды.
Кытай саякаттарда 10 күнгө чейин визасыз өтүүгө уруксат берген өлкөлөрдүн катарына кирген Кыргызстан жарандарына үчүнчү өлкө же аймак аркылуу өтүү шарты коюлганын белгилеген Абдумуталип, төмөнкүлөрдү айтты:
«Эгер кыргызстандык жаран визасыз түрдө Пекинге, Шанхайга же Кытайдын башка бир шаарына барууну кааласа, тандаган шаарга түз билет жана үчүнчү өлкө аркылуу Кыргызстанга кайтуу билеттерин алганы жетиштүү болот. Мисалы, «Шанхай—Алма-Ата—Бишкек» же «Пекин—Ташкент—Ош» багыттары колдонулушу мүмкүн.»
Абдумуталип Кытай тарап Кыргызстан жарандарына өлкөнүн түштүгүндөгү Хайнань аралына 30 күнгө чейин визасыз кирүү уруксатын да бергенин билдирди.
Ал эми Кытай жарандарынын Кыргызстанга кирүүсүндө виза режими күчүндө кала турганын Абдумуталип белгиледи.
Чечим эки тараптуу мамилелерге салым кошоруун баса белгилеген Абдумуталип: «Биз Кытай тарап бул чечимди эки тараптуу кызматташууну жогорку деңгээлде улантуу, реформалардын натыйжалары, Кыргызстанда коопсуздук жана коомдук-саясий туруктуулукту камсыздоо, экономикалык өсүү жана мамлекет үчүн маанилүү документтерди чыгаруу процессинде толук көзөмөл орнотуу өңдүү себептер менен кабыл алган деп эсептейбиз. Бул чечим соода жана туризм багытында кызматташууну өнүктүрүүгө ылайыктуу шарттарды түзөрүнө ишенем», - деди.
