Украинанын тышкы иштер министри Андрей Сибига согушту токтотуу процессин тездетүү үчүн Украинанын президенти Владимир Зеленский менен Россиянын президенти Владимир Путин жолугушушу керектигин билдирди.
Сибига Украинага расмий сапар менен барган Азербайжандын тышкы иштер министри Жейхун Байрамов менен жолугушту.
Эки тараптуу сүйлөшүүлөрдөн кийин Киевдеги Украинанын Тышкы иштер министрлигинде өткөн биргелешкен басма сөз жыйынында сөз сүйлөгөн Сибига Азербайжан менен мамилелерге чоң маани берерин билдирди.
Сибига: "Азербайжандык досторубуз үчүн бир катар сунуштарыбыз бар. Биз Украинага энергетикалык камсыздоону диверсификациялоого кызыкдарбыз", - деди.
"Ортоңку коридор" сыяктуу долбоорлордо Азербайжан менен карым - катнаштарга да чоң маани берерин белгилеген Сибига: "Түштүк Кавказ жана Борбордук Азия менен өз ара аракеттенүү биз үчүн маанилүү", - деди.
Сибига Украина менен Азербайжан бири-биринин аймактык бүтүндүгүн жана эгемендүүлүгүн колдой турганын баса белгиледи.
Сибига согуштун айынан Кара деңиздеги кол салуулардын натыйжасында азербайжандык жарандардын арасында каза болгондордун жана жаракат алгандардын болушуна байланыштуу Байрамовго терең кайгыруу менен көңүл айтып:"Мунун баары Россиянын агрессиясынын натыйжасы", - деди.
"АКШнын сүйлөшүү тобунун келишин күтүп жатабыз"
Сибига ошондой эле согушту токтотууга багытталган АКШ, Украина жана Россиянын ортосундагы мурда өткөрүлгөн үч тараптуу сүйлөшүүлөргө токтолду.
Бул сүйлөшүүлөр бир топ убакыттан бери өткөрүлбөй жатканын белгилеген Сибига: "АКШнын сүйлөшүү тобунун келишин (Киевге) күтүп жатабыз" деди.
Согушту токтотуу үчүн бардык мүмкүнчүлүктөрдү колдонууну кааларын билдирген Сибига: "Менимче, тынчтык аракеттерине чыныгы түрткү бере турган бир гана нерсе - бул Зеленский менен Путиндин жолугушуусу", - деди.
Сибига PATRIOT абадан коргонуу системасында колдонулган ракеталарды жеткирүү же мындай ракеталарды өндүрүү үчүн АКШдан керектүү лицензияларды алуу боюнча ишти улантып жатканын билдирип:"Биз ар бир (PATRIOT) ракетасы үчүн күрөшүп жатабыз",- деп кошумчалады.
