Израиль армиясы оккупацияланган Батыш Шериадагы Хеврон шаарын курчоого алууну беш күн катары менен улантып, 4969 палестиналыкты күч менен көчүрдү.
Хеврон муниципалитети шаардын Айн-Дейр-Баха жана Желда аймактарындагы курчоодон улам үйлөрүн таштап кетүүгө мажбур болгон палестиналыктардын абалы тууралуу маалымат берди. Алардын саны күн сайын өсүүдө.
Муниципалитеттин билдирүүсүнө ылайык, курчоонун бешинчи күнүндө үйлөрүнөн күч менен көчүрүлгөн үй-бүлөлөрдүн саны 780ге, ал эми палестиналыктардын саны 4969га жетти.
Күч менен көчүрүлгөндөрдүн арасында 336 наристе, 441 улгайган адам, 216 кош бойлуу же эмизген эне, 44 майып жана 312 өнөкөт оорусу бар адам бар.
Рейддер жана тинтүүлөр уланууда
Жергиликтүү булактардын жана күбөлөрдүн маалыматына караганда, Израиль армиясынын кошумча күчтөрү түн ортосунда аскердик унаалар менен Хеврондун бир нече конушуна рейд жүргүзүп, палестиналыктардын үйлөрүн тинтишти.
Мындан тышкары, Израиль аскерлери шаарга кирүүчү жолдорду, шаарчаларды жана качкындар лагерлерин тосуп, палестиналыктардын өтүшүнө бөгөт коюуда.
Жалда түйүнүнүн жанындагы аскердик текшерүү пункттарында палестиналыктар токтотулуп, тинтүүгө алынып, катаал мамилеге дуушар болууда.
Ошондой эле курчоодогу Айн-Дейр-Баха аймагына Израиль армиясынын кошумча күчтөрү жайгаштырылды. Израиль аскерлери палестиналыктарга таандык айрым имараттарга жайгашып булимараттарды аскердик штабга айландырышты.
Палестиналык туткундар коому кечээ курчоонун алкагындагы жүргүзүлгөн рейддер учурунда 85 палестиналыктын кармалганын билдирди.
Хеврондогу чабуулга жана курчоого алып келген окуялар
Хеврондогу аскердик чабуул жана курчоо 23-октябрда шаардын түндүк-батыш кире беришине жакын жайгашкан Фарш-аль-Хава аймагындагы Израилдин көзөмөл-өткөрүү пунктуна куралдуу кол салуудан кийин башталган.
Чабуулдан эки израилдик аскер каза болуп, үчөө жаракат алган. Кол салган эки палестиналык да Израиль армиясы тарабынан өлтүрүлгөн.
Израиль армиясы Хевронго каршы чабуул жана курчоо бир нече күнгө созулушу мүмкүн экенин билдирди.
Курчоо башталгандан эки күн өткөндөн кийин Израилдин коргоо министри Исраил Кац үйлөрүн таштап кеткен 2 миңдей палестиналыктын Израиль армиясы шаардагы ХАМАСтын «инфраструктурасын» жок кылмайынча кайтып келе албай турганын айтты.
Чабуулдан кийин премьер-министр Биньямин Нетаньяху оккупациядагы Батыш Шериада 1967-жылдагы согуштан берки эң ири аскердик операцияны баштай турганын билдирди.
Хеврондогу окуялар 2023-жылдын октябрында Газа тилкесине кол салуулар башталгандан бери оккупациядагы Батыш Шериада аскердик рейддердин, палестиналыктардын өлтүрүлүшүнүн жана камакка алынышынын, үйлөр менен ишканалардын кулатылышынын, айыл чарба жерлеринин талкаланышынын жана калкты мажбурлап көчүрүүнүн кескин күчөп жаткан учурда болуп жатат.
