Пакистандын түндүк-батышындагы Хайбер-Пахтунхва провинциясында эмдөө топторун кайтарган полиция кызматкерлерине куралдуу кол салуу болуп, эки полиция кызматкери каза таап, дагы бири жаракат алды.

Жергиликтүү полиция өкүлдөрү кол салуу Хайбер-Пахтунхва провинциясынын Мохманд аймагында болгонун билдиришти.

Маалыматка караганда, полиция кызматкерлери эмдөө жүргүзүп жаткан топторду кайтаруу үчүн аймакта жүргөн учурда куралдуу кол салууга кабылышкан. Натыйжада эки полиция кызматкери каза болуп, дагы бири жаракат алган.

Кол салуунун жоопкерчилигин азырынча эч ким моюнга ала элек.

Пакистандагы терроризм көйгөйү

Пакистандын куралдуу кол салуулар көп катталган аймактарынын катарына Афганистан менен чектеш Хайбер-Пахтунхва жана Белужистан провинциялары кирет.

Бул эки провинцияда тең пуштун жана белуж элдеринин укуктарын коргоону максат кылганын билдирген куралдуу топтор Пакистандын коопсуздук күчтөрүнө жана жарандарга кол салышууда.

Исламабад Пакистан талибдер кыймылынын (TTP) мүчөлөрү Афганистанда баш калкалап, чабуулдарын ошол жактан уюштуруп жатканын белгилесе, Афганистан бийлиги бул айыптоолорду четке кагууда.

Ал эми Белужистан провинциясында «Белужистанды боштондукка чыгаруу армиясынын» (BLA) кол салуулары өзгөчө көңүл бурууда. Бул уюм Белужистандын Пакистандан бөлүнүп чыгышын жана аймакты белуж элинин башкаруусун талап кылууда.