Изилдөөчүлөр Тынч океанда пластик калдыктары көп топтолгон «Улуу Тынч океан таштанды аймагынын» айланасындагы суулардын түсү өзгөрүп жатканын аныкташты. Алардын пикиринде, буга негизинен микропластиктердин топтолушу себеп болушу мүмкүн.
Норвегиялык окумуштуулар океан агымдарынын таасиринен улам миңдеген тонна пластик калдыктары топтолгон бул аймакка байланыштуу акыркы 20 жылдагы спутниктик маалыматтарды изилдешти.
Алар 2002–2022-жылдардын аралыгында Түндүк Тынч океандан алынган үч башка спутниктик маалымат топтомун талдап, пластик калдыктары, анын ичинде балык уулоочу торлор, азык-түлүк таңгактары жана көзгө көрүнбөгөн микропластиктердин топтолгон аймактардагы суунун түсү ачык көк жана жашыл түскө өзгөргөнүн аныкташкан.
Изилдөөчүлөр суунун түсү океандагы биохимиялык өзгөрүүлөрдүн натыйжасында да өзгөрүшү мүмкүн экенин белгилешти. Бирок талдоонун жыйынтыгында бул көрүнүшкө микропластиктердин топтолушу негизги себеп болуу ыктымалдыгы аныкталган.
Изилдөөнүн авторлорунун бири Ши Читэм CNN телеканалына берген маегинде спутниктик маалыматтарда байкалган түс өзгөрүүсү түздөн-түз пластик калдыктарына байланыштуу экенин далилдөө үчүн кошумча изилдөөлөр зарыл экенин айтты.
Изилдөөнүн жыйынтыктары Nature журналында жарыяланды.
Жыл сайын океандарга 13 миллион тоннага жакын пластик түшөт
Окумуштуулардын эсебинде, жыл сайын океандарга болжол менен 13 миллион тонна пластик калдыгы түшөт. Анын 250 миң тоннага жакыны гана суунун бетинде калкып жүрөт.
Океанга түшкөн пластик калдыктарын деңиз жандыктары жеп, алар азык чынжыры аркылуу башка организмдерге да өтүшү мүмкүн.
Натыйжада адамдар керектеген деңиз азыктарынан да табылган микропластиктер океандын экосистемасына гана эмес, адамдын ден соолугуна да коркунуч жаратууда.
