Кара деңиздин туристтик шаарларынын бири болгон Трабзон акыркы мезгилде айрыкча Египет рыногундагы активдүүлүгү менен өзгөчөлөнүүдө.
Облустук маданият жана туризм башкармалыгынан алынган маалыматка ылайык, өткөн жылдын январь-август айларында Трабзондо египеттик коноктордун саны 4450 деп катталган болсо, быйылкы жылдын тийиштүү мезгилинде 5558ге көбөйдү.
Ушундайча бул мезгилде шаардагы египеттик коноктордун саны 25 пайызга өстү.
Ай сайын берилүүчү маалыматтарга караганда, өсүш август айында абдан жогорулаганы байкалды. Өткөн жылдын август айында 1151 египеттик конок келсе, быйылкы жылдын ушул эле айында 1788ге чейин көбөйдү. Бул өткөн жылдын тийиштүү айына салыштырмалуу 55%га өсүштү билдирет.
Салахтын таасири туризмдин ар кандай тармактарына чагылды
Август айында "Трабзонспордун" египеттик жылдыз футболчу Мухамед Салахты командасына кошуп алышы шаардын Египетте таанылышына жана Трабзон менен Египеттин ортосундагы туризм жаатындагы өз ара аракеттенүүгө жаңы өлчөм кошту.
Салахтын Трабзондо жергиликтүү даамдуу тамактардан даам татып жаткан сүрөттөрүнүн социалдык медиада бөлүшүлүшү аймактын гастрономиясына болгон кызыгууну арттырды, ал эми жылдыз футболчу барган Куртдере жайлоосу шаардагы эң көп барган жерлердин бирине айланды.
Египет менен Трабзондун ортосундагы транспорттук байланыштардын жакшырышы туризм ишмердүүлүгүн да колдоп, Каир менен Трабзондун ортосунда түз чартердик каттамдардын ачылышы эки шаардын ортосундагы саякаттарды жеңилдетти.
