Пакистандын баш калаасы Исламабадда бир оорукандын жаңы төрөлгөндөр бөлүмүндө чыккан өрттөн алдын ала маалыматтар боюнча 15 наристе каза болду.

Geo News каналынын кабарына караганда, баш калаадагы Пакистан Медицина илимдери институтунда (PIMS) жайгашкан жаңы төрөлгөндөр бөлүмүндө кондиционер компрессору жарылган соң жергиликтүү убакыт менен саат 06:45те өрт чыккан.

Расмийлер өрт учурунда бөлүмдө болгон наристелердин бирин куткарып калышканын, 15и өмүрүнөн айрылганын билдиришти.

Куткаруу кызматтары өрт өчүрүлгөнүн жана окуя болгон жерде муздатуу иштери улантылып жатканына токтолушту. Өрттүн чыккан себебин иликтөө үчүн тергөө комиссиясы түзүлгөнү маалым болду.