Дүйнөлүк Саламаттыкты Сактоо Уюму (ДССУ) Конго Демократиялык Республикасында 130дан ашык адамдын өмүрүн алган өлүмгө алып келген Эбола вирусунун "масштабы жана ылдамдыгы" боюнча тынчсыздануусун билдирип, анын узакка созулушу мүмкүн экенин эскертти.
БУУга караштуу саламаттыкты сактоо агенттиги жогорку температура жана геморрагиялык ысытма менен мүнөздөлгөн жугуштуу оору болгон Эболанын акыркы толкунун эл аралык саламаттыкты сактоо боюнча өзгөчө кырдаал деп жарыялады.
Конго Демократиялык Республикасынын чыгышында болгон кагылышуулардан жабыркаган аймактардагы адамдар медициналык каражаттарды күтүп жатышат, ал эми "Чек арасыз дарыгерлер" (MSF) уюму жергиликтүү ооруканалар ашыгы менен толуп кеткендиктен бейтаптарды кабыл албай жатканын билдирди.
Өлкө тарыхындагы бул 17-эпидемияга себеп болгон Бундибугио (Bundibugyo) штаммына каршы вакцина же атайын дарылоо ыкмасы азырынча жок.
Конгонун Саламаттыкты сактоо министри Самуэль Роджер Камба 136 өлүм жана 543 шектүү учурду тастыктап, эл аралык жардам сурады.
Вирус коңшу өлкөлөргө да жайылып, Уганданын чек арасынан өттү. Ал жакта учурда бул илдетти жуктурган эки учур катталды.
АКШнын ДССУга карата сыны
АКШнын Мамлекеттик катчысы Марко Рубио шейшемби күнкү билдирүүсүндө, Дүйнөлүк Саламаттыкты Сактоо Уюму (ДССУ) бул кооптуу эпидемияны аныктоодо кечигип жатканын билдирди.
Рубио журналисттерге берген маалыматында: "Бул багытта алдыңкы орундагы мекемелер, албетте, Ооруларды көзөмөлдөө жана алдын алуу борборлору менен Дүйнөлүк Саламаттыкты Сактоо Уюму болушу керек. Тилекке каршы, алар бул кырдаалды аныктоодо кеч калышты", — деди.
Мамлекеттик департаменттин жогорку мартабалуу өкүлү БУУга караштуу аталган уюм эпидемияны ырастаганга чейин 10 күн өтүп кеткенин белгилеп, ДССУнун "бир нече жолу ийгиликсиздикке учураганын" ырастады.
ДССУ болсо бул айыптоолорду четке кагып, бардык өлкөлөр менен кызматташуусу керектигин билдирди.
АКШнын Мамлекеттик департаменти 13 миллион долларлык баштапкы фонд бөлүү менен 50гө жакын дарылоо борборун каржылай турганын жарыялады. Рубио согуштан жабыркаган өлкөдө эпидемия жайылган аймактарга жетүү кыйын экенин моюнга алды.
Ошондой эле АКШ Мамлекеттик департаментинен бир жетекчи Конго Демократиялык Республикасына, Угандага же Түштүк Суданга барган жана америкалык жарандыгы жокторго коюлган чектөөлөргө карабастан, Вашингтон Конго Демократиялык Республикасынын улуттук футбол курама командасына Дүйнө чемпионаты үчүн Америка Кошмо Штаттарына келүүгө уруксат берерин маалымдаган.
17-июнда Португалия менен ойноло турган беттешке чейин Хьюстондо машыгуу базасын түзүүнү пландап жаткан команда, өлкөгө кайтып келген америкалык жарандардан талап кылынгандай эле атуу текшерүү жана обочолонтуу протоколдоруна киргизилет.
Министрликтин өкүлү өлкөгө кирүүгө берилген бул өзгөчө уруксат Конго Демократиялык Республикасынан келе турган катардагы күйөрмандарга тиешелүү эмес экенин өзгөчө баса белгиледи.
