Египеттин борбору Каирдеги соода борборундагы жарылуудан үч адам каза болуп, 17 адам жаракат алды.
Жаңы Каир районундагы "Арабелла Плаза" соода борборунун биринчи кабатындагы белек жана оюнчук дүкөнүндө гелий газ баллону жарылып, өрт чыкты.
Окуядан үч адам каза болуп, 17 адам жаракат алды.
Египеттин Ички иштер министрлиги жарылуу "Арабелла Плаза" соода борборунда болгонун жана андан кийин чыккан кичинекей өрт жарандык коргонуу топтору тарабынан көзөмөлгө алынганын билдирди.
Жарылуудан улам жакын жердеги айрым дүкөндөрдүн терезелери да зыян тартканы кабарланды.
Египеттин Башкы прокуратурасы жарылуу болгон дүкөндүн ээсин камакка алууну буйруганын билдирди.
Башкы прокуратура алгачкы тергөөлөр жарылуу газ баллонунан улам болгонун аныктап, окуянын себебин иликтөө үчүн эксперттик топтор дайындалганын маалымдады.
Окуя боюнча тергөө иштери уланууда.
