НАТОнун башкы катчысы Марк Рютте 7-8-июлда өтө турган Анкара саммити союздаштардын өз милдеттенмелерин аткаруусуна багытталарын билдирди.
Рютте азыркы коопсуздук чөйрөсү алда канча кооптуу экенин жана ошондуктан НАТОнун союздаштарынын коопсуздукту камсыз кылуу үчүн биргелешип иштеши өтө маанилүү экенин айтты.
Рютте Орусиянын Европа жана Атлантика коопсуздугуна "эң чоң коркунуч" бойдон калганын, союздаштар киберчабуулдар жана саботаж сыяктуу коркунучтарга да дуушар болуп жатканын маалымдады.
Украина жана Жакынкы Чыгыш Швециядагы союздаштар үчүн күн тартибинин негизги пункттарынын бири болорун баса белгилеген Марк Рютте, Ормуз кысыгы темасында союздаштардын чара көрүп жатканына көңүл бурду.
Рютте Ормуз кысыгын жабуу кеме жүрүү эркиндигине жана дүйнөлүк соодага түздөн-түз кол салуу болуп эсептелерин, көптөгөн өлкөлөр кеме жүрүү эркиндигин камсыз кылуу пландарынын айланасында биригип жатканын кабарлады.
Негизги маселенин болсо аткаруу экенин баса белгилеген НАТОнун башкы катчысы Рютте, НАТОнун түздөн-түз катышуусу боюнча айрым расмий эмес талкуулар жүрүп жатканын, кырдаалдын динамикалуу экенин айтты.
Гаага саммитинде союздаштар коргонуу каржылоолору боюнча тарыхый чечим кабыл алганын эске салган Рютте: "Ошондуктан Анкара саммити союздаштардын өз милдеттенмелерин аткаруусуна багытталат. Маселе мындан ары биз көбүрөөк иш-аракет кылышыбыз керекпи же жокпу дегенде эмес. Чыныгы суроо союздаштар өз милдеттенмелерин канчалык тез мүмкүнчүлүктөргө айландыра алуулары", - деди.
