Түндүк Кореянын билим берүү министри Ри Йон Чхоль менен Орусиянын билим берүү министри Сергей Кравцов эки тараптуу мамилелерди, айрыкча билим берүү тармагын тереңдетүүнүн жолдорун талкуулашты. 

Түндүк Кореянын борбордук маалымат агенттигинин (KCNA) кабарына караганда, Түндүк Кореянын баш калаасы Пхеньянга расмий сапар менен барган Кравцов түндүк кореялык кесиптеши Ри менен жолугушту. 

Жолугушууда тараптар эки өлкөнүн билим берүү тармагындагы "жетишкендиктери жана тажрыйбалары" боюнча пикир алмашып, эки тараптуу мамилелерди жана кызматташтыкты тереңдетүүнүн жолдорун талкуулашты. 

Стратегиялык өнөктөштүк келишими 

Түндүк Кореянын лидери Ким Чен Ындын 2023-жылдын сентябрь айында Орусиянын Чыгыш Сибирь аймагына сапары Пхеньян менен Москванын ортосундагы мамилелерде жаңы доордун башталышы болгон. 

Тогуз айдан кийин Орусиянын президенти Владимир Путин Түндүк Кореяга расмий сапар менен барып, анын жүрүшүндө эки өлкөнүн ортосунда ар тараптуу стратегиялык өнөктөштүк келишимине кол коюлган. 

Орусиянын лидери Путин келишим тараптардын бирөөнө кол салуу болгон учурда экинчисине аскердик жардам көрсөтүүгө милдеттендирилгенин билдирген. 

Түндүк Кореянын лидери Ким да келишимди "пакт" деп атап, мамилелер "жогорку союздаштык" деңгээлине көтөрүлгөнүн баса белгилеген.