Россия Украинанын Одесса портунда аскердик жүк ташуучу кемеге жана Одесса облусундагы логистикалык борборго сокку урганын билдирди.
Россиянын Коргоо министрлигинин билдирүүсүндө орус аскерлери түнү бою Украинанын порттук инфраструктурасына жана украин аскерлери колдонгон кемелерге дрондор менен чабуул жасаганы белгиленди.
Министрликтин дагы бир билдирүүсүндө Россиянын абадан коргонуу системалары кечээ саат 20:00дөн бүгүн эртең мененки саат 08:00гө чейин өлкөнүн ар кайсы аймактарында, негизинен Москвада жана айланасында 644 украин дронун жок кылганы айтылды.
Москва шаарынын мэри Сергей Собянин социалдык тармактарда кечээ кечтен бүгүн эртең мененге чейин Москвага багыт алган 94 дрон абадан коргонуу системалары тарабынан атып түшүрүлгөнүн билдирди. Ал дрондордун сыныктары түшкөн жерлерде ыкчам кызматтар ишин улантып жатканын кошумчалады.
Россиянын Федералдык аба транспорту агенттигинин (Росавиация) маалыматына караганда, түн ичинде дрон чабуулдарына байланыштуу өлкөнүн бир катар шаарларындагы аэропорттордо, анын ичинде Москвадагы аэропорттордо жана Санкт-Петербургдагы Пулково аэропортунда каттамдарга убактылуу чектөөлөр киргизилди.
