Франциянын Мёрт-эт-Мозель аймагында Mirage 2000D согуштук учагы кырсыкка учурап, бир адам каза болду.
Франциянын Коргоо министрлигинин маалыматына караганда, Франциянын Аба жана космос күчтөрүнө таандык учак кечээ жергиликтүү убакыт боюнча саат 22:40та өлкөнүн түндүк-чыгышындагы Мёрт-эт-Мозель аймагына караштуу Рожвиль шаарында кырсыкка учурады.
Билдирүүдө учак Нанси-Ошей 133 аба базасында жайгашкан эскадрильяга таандык экени жана тапшырманы аткарып кайтып келе жатканда кырсыкка учураганы белгиленген.
Учактын бортунда учкуч жана курал-жарак системалары боюнча офицер болгон. Издөө-куткаруу иштеринин жүрүшүндө бир адамдын сөөгү табылып, аны аныктоо иштери баштатылды.
Министрлик кырсыктын себептерин аныктоо үчүн соттук жана коопсуздук тергөөсү жүргүзүлүп жатканын кошумчалады.
