Түркиянын тышкы иштер министри Хакан Фидан социалдык медиа баракчасына Бириккен Улуттар Уюмунун (БУУ) Башкы Ассамблеясынын 81-сессиясынын жумалыгына байланыштуу билдирүү жарыялады.

Фидан БУУнун Башкы Ассамблеясынын 81-сессиясынын жумалыгынын алкагында АКШнын Нью-Йорк шаарында президент Эрдогандын жетекчилиги астында тыгыз дипломатиялык иш-аракеттерди жүргүзгөнүн эске салды. Ал президенттин жолугушууларынан тышкары, министрликтин жана башка түрк мекемелеринин кызматкерлери да көптөгөн эки тараптуу жолугушууларды өткөрүп, ар кандай жолугушууларга катышуу менен Түркияны өкүлдүк кылышканын билдирди.

Фидан жума бою бул иш-чаралар түрк дипломатиясынын ар кандай географиялык аймактарга жайылышынын натыйжалуулугун жана кеңири күн тартиби боюнча демилге көтөрүү жөндөмүн чагылдырганын баса белгилеп, мындай деп кошумчалады:

"Биз Палестина, климаттын өзгөрүшү, азык-түлүк коопсуздугу, ортомчулук жана миграция сыяктуу маселелер боюнча жүргүзүлгөн иштерге салым коштук. Биз өткөрө турган БУУнун климаттын өзгөрүшү боюнча алкактык конвенциясынын 31-Тараптар конференциясына (COP31 саммити) байланыштуу артыкчылыктарыбызды жарыяладык".

Түркиянын демилгелерине жана кризистерди тынчтык жолу менен чечүү боюнча сунуштарына көрсөтүлгөн кызыгуу өлкөнүн дипломатиялык салмагынын өсүп жатканын дагы бир жолу көрсөтүп турганын баса белгилеген Фидан: «Президентибиздин жетекчилиги астында биз өлкөбүздүн укуктарын жана кызыкчылыктарын коргоо, аймагыбызда тынчтыкты жана туруктуулукту чыңдоо жана адилеттүү эл аралык тартипти курууга салым кошуу үчүн ошол эле чечкиндүүлүк менен иштей беребиз», - деди.