Жергиликтүү маалымат каражаттары АКШнын Геологиялык кызматына (USGS) шилтеме берип, дүйшөмбү күнү Филиппиндин түштүгүндө болгон 7,8 баллдык жер титирөөдөн кийин аймакта кеминде беш адам каза болуп, имараттар кулап, цунами жөнүндө эскертүү берилгенин билдиришти.
АКШнын Тынч океан цунами эскертүү борборунун маалыматы боюнча, Минданао аралындагы Сарангани провинциясынын жээгиндеги ири жер титирөөдөн кийин Филиппиндин айрым жээктеринде бийиктиги 3 метрден ашкан цунами толкундары байкалган.
Германиянын Геологиялык кызматы (GFZ) жер титирөө Минданаодо 10 км тереңдикте болуп, 8,2 баллга жеткенин билдирди.
Эпицентри Филиппиндердин Буриас шаарынан батыш-түштүк-батышта 24,7 чакырым алыстыкта, 35 чакырым тереңдикте болгон. Жер титирөө эртең мененки саат 7:37де болгон.
Бийлик өкүлдөрү түштүктө жайгашкан Генерал-Сантос шаарында кеминде беш адамдын каза болгондугу тууралуу кабарларды тастыктады. Жер титирөөдөн көптөгөн имараттар зыян тарткан же кулаган.
Жер титирөөдөн кийин Филиппиндин, Индонезиянын жана Япониянын жээктеринде цунами жөнүндө эскертүү берилген. Филиппиндин президенти Фердинанд Маркос жабыркаган аймактарда мектептер жабылганын жарыялап, жээктеги жарандарды тезинен эвакуациялоого чакырды. Бийлик тургундардан тезинен бийик жерлерде баш калкалоону суранды.
Тынч океанынын "от шакекчесинде" жайгашкан Филиппин дүйнөдөгү эң жогорку сейсмикалык активдүүлүк жана жер титирөө болгон өлкөлөрдүн катарына кирет.
