Кремлдин басма сөз катчысы Дмитрий Песков 2022-жылдын февраль айынан бери согуш жүрүп келе жаткан Украинада убактылуу ок атышпоону эмес, узак мөөнөттүү тынчтыкты каалагандарын билдирди.
Москвада журналисттер менен маектешүүдө Песков Украинанын президенти Владимир Зеленскийдин эгерде Орусиянын президенти Владимир Путин 60 күндүк ок атышпоону кабыл алса, Украинада шайлоо өткөрүлүшү мүмкүн деген билдирүүсүнө комментарий берди.
Украинадагы жаңжалды токтотуу боюнча Орусиянын позициясы өзгөрбөгөнүн айткан Песков: "Орусияда Путин тарабынан да, башка деңгээлдерде да бир нече жолу айтылды. Биз ок атышууну токтотууну эмес, узак мөөнөттүү тынчтыкты каалайбыз жана бул үчүн колубуздан келгендин баарын жасоого даярбыз", - деди.
АКШнын президенти Дональд Трамптын Орусия менен Украина энергетикалык инфраструктурага кол салууну токтотуу үчүн ок атышпоого макул болгону жөнүндөгү билдирүүсү боюнча суроого жооп берип жатып Песков: "Сүйлөшүүлөр уланууда. Бул тема боюнча айта турган сөзүбүз болгондо, сизге сөзсүз кабарлайбыз", - деди.
Европа өлкөлөрүнүн Украина кризисине болгон мамилесине да сереп салган Песков, европалыктар жаңжалдын аякташына жол бербөө үчүн аракет кылып жатышканын айтты.
Песков Европа өлкөлөрүн "согушту жактагандар" деп мүнөздөп: "Биз америкалык сүйлөшүүчүлөрдүн аракеттерин алда канча позитивдүү карайбыз жана бул аракеттерди улантканы үчүн аларга ыраазыбыз. АКШ менен Европанын ортосунда бөлүнүү жаратууга аракет кылып жаткан жокпуз; биз тынчтык жолу менен чечимге алып келе турган натыйжалуу кадамдарды жана жоопкерчиликтүү чечимдерди издеп жатабыз", - деди.
