Ирандын Ислам революциясынын сакчылар корпусунун (ИРСК) деңиз күчтөрү дүйшөмбү күнү Ормуз кысыгындагы Кешм аралынын түштүгүндө АКШга таандык аскердик учкучсуз учуучу аппаратты кармап, зыянга учуратпастан конууга мажбурлаганын билдирди.
ИРСКнын коомчулук менен байланыш бөлүмүнүн маалыматына ылайык, MQM-170 үлгүсүндөгү дрон дүйшөмбү күнү эртең менен электрондук согуш операциясынын жүрүшүндө башкарууга алынган.
Билдирүүдө америкалык дрон Ирандын абадан коргонуу жана электрондук согуш системаларын аныктоого аракет кылганы айтылат. Иран күчтөрү аппараттын башкаруу системасын көзөмөлгө алып, аны Кешм аралынын түштүгүнө зыянсыз конууга мажбурлаган.
ИРСКнын деңиз күчтөрүнүн маалыматы боюнча, бул электрондук согуш каражаттары аркылуу кармалган төртүнчү дрон. Ошондой эле Ормуз кысыгынын аймагында ИРСКнын абадан коргонуу системалары тарабынан бүтүн бойдон кармалган дрондордун саны сегизге жеткени белгиленди.
Иран тарап буга чейин АКШнын MQ-9, MQ-1 жана «Лукас» үлгүсүндөгү чабуулчу учкучсуз аппараттарын да кармап, жок кылганын же иштен чыгарганын билдирген.
Азырынча АКШнын расмий өкүлдөрү Ирандын бул билдирүүсүнө комментарий бере элек.




















